KABHI KABHI

Kabhi kabhi...
kuchh kho jata hai,
jab hum dhundhte hain.

kabhi kabhi...
deewarein baat karna chahti hain..
humse,
aur hum...
hum masroof rehte hain khud me,
sirf tab hi dekhte hain iski taraf
jab deewar-ghadi par waqt dekhna ho.
par inn deewaro ke liye
hamaare paas waqt nahi hota.

aur kabhi kabhi..
hume kehna hota hai kuchh
inn deewaron se.
jab ye hume bandish lagti hain,
qaid lagti hain.
hum bhul jate hain
ki chhat bhi ek deewar hi hai..

kabhi kabhi...
hum bahut rote hain uske liye
jo pal bhar ke liye khushi de gya tha.
par kai umar bhar ki khushiyo ka
shukriya tak nahi karte.

kabhi kabhi...
yun lagta hai maano
ye sirhaana humara sabse sacha dost hai.
jo humara sir hamesha uncha rakhta hai
aur jab hum chhupna chahte hain,
rona chahte hain
humein apne aagosh me chhupa leta hai.

kabhi kabhi...
saans lete logo se duriyaan bhaane lagti hain.
kabhi kabhi...
bejaan cheezon se mahobbat ho jati hai.

kabhi kabhi..
kamre me akele baithkar
sochte hain,
kuchh likhte hain
aur faad dete hain.

kabhi kabhi..
apne cellphone ke inbox ko khangaalte hain.
kuchh puraane message padte hain.
wo msg...
jo inbox ke sath sath humare dil me bhi jagah rakhte hain.

kabhi kabhi...
hum yunhi,
bina baat ke
udaas chehra liye bhi,
thodi thodi der baad muskura uthate hain.

kabhi kabhi...
hume khud pta nahi rehta
ki hum kya kar rahe hain,
kyu kar rahe hain.

bas maan lete hain
ki ye sab kisi mahobbat ka koi hissa hain.

aur kabhi kabhi...
nahi maan paate.