1096 DIN

Paas the toh adayagi pe mare,

Dur hue toh deewangi pe mare,

1096 din…

Sirf usi pe mare.

Milne aaye toh mulakat pe mare,

Bichhudne lage toh haalaat pe mare,

1096 din…

Har bisaat pe mare.

Khushi mili toh muskurahat pe mare,

Takleef hui toh jhallahat pe mare,

1096 din…

Aahat-aahat pe mare.

Bebaat mare,berukhi pe mare,

1096 din…

Bebasi pe mare.

Kya se kya ho gaya ‘Chaaras’,

Koi naa itna kisi pe mare.

EK SHAAYARI

Ek shaayari fenki unki jaanib likhkar,

Wo thama gaye wapis ‘Ghaalib’ likhkar.

Lauta diya ulte humne zaalim likhkar,

Wo khush hue ‘anjaam-e-aashiq’ likhkar.

Sharmaye hum jawab munaasib likhkar,

Tilmilaye wo ‘mere muhalle dikh’ likhkar.

Haar gaye hum pit-pit kar aur wo…

Raazi naa hue koi baat wajib likhkar.

Hum aa gaye unhe akhiri Zidd likhkar,

Wo na tutey ,tuti har-ek nib likhkar.

kambhakht hawa tak na lagi kab unhone..

 “Chaaras” bana dala itna likh-likhkar.

TUM ZARA AAJAO NA!!

Yaadon ka tanha safar hai aya…

Tum zara aajao na!

Main hun akela, thoda ghabraya,

Tum zara aajao na!

Kuchh zindagi hai lapta,

Rehta hai dil tumhe taakta,

Mujh par hansa hai mera saya,

Tum zara aajao na!

Koi sahara toh dur ki baat..

Dur-dur tak nahi koi sath,

Aaj fir mai bechara kehalaya,

Tum zara aajao na!

Dil ne bahut puchha tumhare bare me..

kahan ho tum, kaisi ho tum,

Aur ‘Chaaras’…. kuchh nahi keh paya,

Tum zara aajao na!

Yaadon ka tanha safar hai aya…

Tum zara aajao na!

Main hun akela, thoda ghabraya,

Tum zara aajao na!

NARAZGIYAN

Narazgiyaan pehchan walo se..

Dosti ko tamasha bante der nahi lagti,

Khwabo ko wajood me hissa de do..

Haqiqat ko hadsa bante der nahi lagti,

Fark padta hai kaun hai saaki..

Sadagi ko nasha bante der nahi lagti,

Khamoshi hai sabse behatar wada..

Varna wado ko hawa bante der nahi lagti,

Insaan bankar naa mila kar ‘Chaaras’..

Logo ko khuda bante der nahi lagti.

KYA THA AGAR

Kya tha agar jugnoo chamak jate,

Kuchh der aur hum bhi behak jate,

Kisi bheegi-bheegi shaam unke sang,

Nange paanv sadak-sadak jate.

Reath par unki ungaliyaan tikti bhar,

Phool kyaari bhar-bhar mehak jate.

Dekha hai falak ki narazgi me humne…

Zameen ko rooh tak tadap jate.

Gar milaa karte dard kisi se maangkar,

Hissa-hissa hum unka hadap jate.

Unhone aaj tak muskura kar nahi dekha,

Varna dekhte ‘Chaaras’ ko mar-khap jate.